Suomi evakujiiruiččou Afganistanan posol’stvas ruadanuot vardoiččijat.
Valdivonevvosto piätti ylimiäräzes istundos, gu posol’stvan nenga 80 (kaheksakymmen) vardoiččijua sego 45 (nellikymmen viizi) muudu ruadajua evakujiiruijah perehinneh. Nenga sit piätöksen mugah Suomeh evakujiiruijah kaikkiedah läs 300 (kolmiesadua) afgančua. Ulgoaziiministran Pekka Haaviston mugah yhtelläh voibi olla, gu ei kaikin piästä Kabulan aerodromale.
Suomes on otettuhes tutkimah hätkenkestäjiä koronatavvin vaikutustu. Sociali- da tervehysministerstvan luajittu sprecialiston joukko keriäy tieduo long covid -taudih näh sego sellittäy, kui sidä tieduo voibi käyttiä avukse piätöksenluajindas. Hätkenkestäjän koronatavvin täh roih kaikenualastu mostu tavvinmerkii, kui ezimerkikse yliväzyndiä, kibuu da keskittymismaltamattomuttu.
Matkuandu- da restoranualan mennyh kezä jäi alan edujärjestön mugah pahembakse, migu julgižuos oli sanottu. MaRan ozanottajankyzelyn mugah monil alan yrityksil liikehvaihto pieneni vähimyölleh viijesvuitil verraten kezäh 2019 (kaksituhattu yheksätostu), konzu vie ei olluh koronua. Tulies sygyzysgi matkuandu- da restoranualal ei vuoteta äijiä. Suurin vuitti yrityksis on sidä mieldy, gu liikehvaihto vähenöy.
Päivännouzu-Suomen yliopisto sellittäy, kui korona-aigu on vaikutannuh eloksen merkičykselližyön kogemukseh. Kaksivaihiezeh tutkimukseh niškoi nygöi ečitäh ozanottajii. Enzimäzeh vaihieh voijah ottua ozua täyzi-igähizet Suomes eläjät ristikanzat, toizes vaihies tutkitah vahnoin kogemuksii. Tutkijat toivotah keräle mahton mugah eriluadustu rahvastu, da nenga sit eriluaduzet muailmankuvat, kogemukset da arvot tullah nägövih.
Parandushoidoloin kriminaliziiruičendua vuadii kanzalasaloiteh on kerännyh kačottavakse parluamentas tarvittavat 50 000 (viizikymmen tuhattu) iändy. Aloittehen tarkoitus on kieldiä seksualu- da sugupuolivähembistölöin muga sanottuh parandamizeh viejät hoijot, kudamien vuoh hoijettavu ristikanzu opitah muuttua cis-sugupuolizekse heteroseksualakse. Cis-sugupuoline ristikanzu on moine, kudai identificiiruiččeh hänelleh roindas miäriteltyh sugupuoleh.
Vastahottokeskukses eläjäh pereheh näh sanelii suomelaine kino Ensilumi on ehoitettu Pohjazien mualoin nevvoston kinopalkindon suajakse.
Fil’man on ohjannuh suomelas-iranalaine kino-ohjuaju da käzikirjuttai Hamy Ramezani. Vuvven 2021 (kaksituhattu kaksikymmen yksi) kinopalkindon voittai sanotah julgi kylmykuul Kopengagenas.
Lapis opitah šiiloin sobivuttamistu poron syömizekse. Luonnonvarakeskus da Lapin Ammattikorgeiškola sellitetäh, ongo šiiloi tervehelline syömine poroloih niškoi. Tulien talven aigua šiiloikormua opitah andua Paliskuntain yhtistyksen koitehporoloile. Porot syvväh šiiloikormua nelli kuudu, da tutkijat kačotah elättilöin hyvinvoindua paiči muudu verikoittehis.
Sygyzyl roih äijy buolua, nenga sanou Luonnonvarakeskus. Räken kezän täh buolale rodih probliemua enne kaikkie kuivil alovehil, ga pölytys lykystyi tavanmugastu parembah. Räket ilmat piettih buolua pölyttäjät böbökät kirkielöinny. Luonnonvarakeskuksen mugah buolu kestäy kuivuttu parem, migu ezimerkikse must’oi, kuduadu oli tänä vuon vähä.
Siirry sarjan sivulle arrow_forward_iosJAA:
