Koronarajoituksii on purrettu Suomes liijakse ruttoh.
Nenga arvivoijah tervehyönhuolon specialistat. Halličus piätti luobuo rajoituksis ligakuun lopul, hos rokotettuloin miäry vie ei ole sil tazol, midä halličus pidi täydyjänny rajoituksien iärestämizeh näh. Nygöi korona leviey enne kaikkie rokottamattomien keskes. Koronah läževynnyöt täytetäh bol’ničat, da sendäh toizien voimattomien leikkavuksii on jovvuttu erähis kohtis siirdämäh.
Koronapasportan vastustajat ollah häiriköitty Suomen eri čuril. Matkuandu- da restoranualan edujärjestön Maran mugah kaupiččijoi da restorananyrittäjii on varaitettu da ruadajii koirittu. Koronapasportan vastustajat sežo ollah kehoitettu boikotiiruimah restoranoi, kuduat vuajitah käyjil koronapasportua.
Kolmie hengie vastah on nostettu viäritykset koronatestan käymättäh jätändäs. Nämmä ollah enzimäzet suudodielot, kuduat liitytäh koronatestoi koskijah zakonanpygäläh. Kezäl tartundutaudizakonah luajittih väliaigahine ližävys, kudaman mugah täyzi-igähine ristikanzu voibi suaja štruafun, ei pidäne häi nareko huoldu koronatestan luajindas.
Školien kiuzuandan vastazien metodoin tulokselližuttu arvivoijah tulien keviän. Arvivoičendu on vuitti opastus- da kul’tuuruministerstvan programmua kiuzuandan da vägivallan estämizekse. Nengomua arvivoičendua Suomes aijemba ei ole todevutettu. Lähtökohtannu on se, gu školil olis mahto ruadua tovengi vaikuttajua kiuzuandan vastastu ruaduo. Läs puoldu školakiuzuandois aiguhizet ni vouse ei tiijusteta.
Nuoris miehis on vajavuttu kui veren da kandusoluloin, mugai sugusoluloingi andajinnu. Verenandajis vähem 40 (nelliäkymmendy) prosentua on miehii, da Kandusoluregistras miehii on läs 30 (kolmiekymmendy) prosentua. Vuitit ollah sidä pienembät, midä nuorembas igäjoukos on pagin. Veripalvelun mugah nuoret miehet tuodas ližiä varmuttu Suomen verihuoldoh. Kandusoluloin andamizes miehet vallitah andajikse naizii puaksumbah yhtehsovindušeikois rippujen.
Kanzalasaloiteh kaivoksil kieltylöis alovehis eistyy edehpäi parluamentan kačeltavakse. Ezmässargen ehtäl aloiteh suavutti parluamentan kaččelendah niškoi vuadijat 50 000 (viizikymmen tuhattu) allekirjutustu. Kaivosruandale rajat -kanzalasaloittehen tavoittehenu on ližätä zakonah alovehii, kudamil kaivosruandua libo malminečindiä ei sua luadie. Taga-alal on huoli sit, gu arvokkahii luondokohtii voijah čällätä.
Poštan juandu on harvenemas Suomes. Halličus ezittäy, gu poštan viizipäiväzes juandas siiryttäs kolmepäiväzeh, kui aijemba dieluo miettinyh valdivosekretariruadojoukko ehoittigi. Sanomulehtilöin juandan halličus tahtou turvata harvazeh eloitettuloil alovehil viijenny päivänny nedälis miäryaigahizel valdivonavustuksel. Jagajat vallittas kilbavutuksen vuoh.
Riistuelättiozattomuksii pyrritähes vähendämäh uvven tehnolougien vuoh. Seinäjovel testiiruijah Välkky-vakustussistiemua. Sit loitto-ohjattavu valgo vilkuttau ehtyhämäris da konzu sistiemu on dogadinnuh hirven. Vauhtirajoitusmerki voibi sežo ozuttua alendettuu vauhtirajoitustu, konzu ozattomusrisku on suurembi.
Siirry sarjan sivulle arrow_forward_iosJAA:
