Tiedomurron žertvoikse roinnuot Vastaamo-psihoterapienkeskuksen klijentat vuvvekse suajah iččeh käyttöh maksottah Asiakastiijon
Tiedomurron žertvoikse roinnuot Vastaamo-psihoterapienkeskuksen klijentat vuvvekse suajah iččeh käyttöh maksottah Asiakastiijon OmaLuottoKielto-turvumerkičendän da Tiedovahti-palvelun.
Net avvutetah estämäh heijän hengilötiedoloin talovehellistu hyövyndämisty rikollizih tarkoituksih niškoi. Klijentutiijon toimitusjohtai sanou, gu tärgei on ruadua terväh. Sih näh tarkembua tieduo suat Ylen saital.
Finansualan mugah Vastaamon tiedovuvvon tiedoloil ei voija ottua bankas laihinua, sendäh gu sih näh pidäy ainos varmah tunnistuakseh ezimerkikse bankutunnuksil.
Hengilötunnuksien da toizien hengilötiedoloin vuoh rikolline yhtelläh voibi ozittuo luadimah ezimerkikse tilavuskielastandua, vuittimaksokauppua libo ottamah muudu laihinua žertvan nimel.
Suomes voibi olla tuhanzii ristikanzoi, kuduat ollah voimatuttu koronah da taudi on pyzynyh kuuloi.
Enzimäzen allon voimattomis suuri vuitti jäi ilmai koronadiagnozua, sendäh gu kaikkii ei testiiruittu.
Voimatunnuot nygöi vuajitah suurdu tiijoitustu Tervehyön da hyvinvoindan laitoksespäi sego Sociali- da tervehysministerstvaspäi. Nenga sit tavallizet liägärit voidas tunnistua koronan täh roinnuot hätken kestänyöt tavvinmerkit.
Tutkimuksien mugah koronan jälles ilmitulluot tavvinmerkit voijah viijä ruadomalton sežo nuorel da perustervehel.
Finnair-lendoyhtivön tulos heiny-syvyskuul painui selgiehgi hävivöh.
Finnairan verdailumaltoine liikehtulos oli 167 (suan kuvvenkymmenen seiččemen) miljonan euron hävivölline, konzu vuozi tagaperin samazel aigua yhtivöl oli enäm 100 (sadua) miljonua euruo voittuo.
Finnairan mugah koronapandemii da enne kaikkie Suomen lujat matkuandurajoitukset kovah vaikutettih liikehtulokseh.
Matkuniekoin miärät ollah pienetty nenga 89 (kaheksalkymmenel yheksäl) prosental, da yhtivön liikehvaihto yhten verran.
Vuitti kunnis on zavedinnuh riskujoukkoloin influensurokotukset, nenga sanou THL.
Piäozin rokotuksii ruvetah luadimah tulien kuun allus.
Riskujoukkoh kuulujat suajah influensurokottehen ilmai.
THL:n mugah influensukauzi vie ei ole alganuh Suomes.
Päivännouzu-Uvvenmuan paikalline suudo on piättänyh pidiä voimas United Brotherhood -rikollisjoukole miärätyn väliaigahizen ruandukiellon.
Nečen rikollisjoukon salbuamistu vuadijat eričysviärittäi da Policiihalličus vuajittih ruandukiellon jatkandua da sen johtai vastusti sidä.
Ruandukieldo oli miärätty allunperin pakkaskuul. Silloi paikalline suudo tovendi, gu United Brotherhood on valdukunnallizesti ruadai organizuinnuhes rikollisjoukko, kudai toimiu hijeharhizesti da imitiiruijen vojennoidu organizaciedu.
Koronan täh kärzii jarmankuala eččiy uuzii taboi suaja rahvastu.
Keviän jälles läs kai jarmankat siirrettih, da nygöi jarmankoi opitah pidiä virtualizesti. Nedälinvaihtos verkos piettih svuad’bujarmanku da Helsingin kniigujarmanku. Alal uskotah, gu virtualizesti piettäväkse ielleh roih alalline vuitti jarmakoi.
Siirry sarjan sivulle arrow_forward_ios JAA:
