Vie yksi liečeyhtivö on sanelluh lykkyh näh koronarokottehen kehitändäs.
Yhtysvaldalazen Moderna-liečeyhtivön mugah sen rokoteh on 95 (yheksäkymmenviizi)-prosentazesti effektiivine koronaviirusan täh roittavua taudii vastah.
Lugu pohjavuu aigazih tuloksih 30 000 (kolmenkymmenen tuhanden) ozanottajan kliinizis koittehis.
Euroupan Unionan tervehyskomissuaru Stella Kyriakides sanou, gu EU nevvottelou yhtysvaldalazen Moderna-yhtivönke rokottehen ostamizes. Nevvottelut ollah kesken.
Mennyt nedälil Pfizer da Biontech sego ven’alazen Sputnik-rokottehen finansiiruiččijat ilmoitettih, gu niilöin rokottehet annetah lujan suojan covid-19 (yheksätostu)-taudii vastah.
Viärittäi vuadiu Kuopion kaksi vuottu tagaperin tapahtunnuos bussuozattomuos andua šouferile vähimyölleh kaksi vuottu tyrmiä.
Šouferinnu ruadanuh mies kiistäy viäritykset tylgies liikendehturvalližuon varaitandas sego tylgies kuolendan- da sattavundantuottamizes. Häi myöndäy viäritykset perusmuodozinnu.
Kaksi vuottu tagaperin roinnuos ozattomuos kuoli nelli hengie, konzu tilattu autobussu livestyi Kuopion dorogan da Kolmisopen liittymäs tielpäi da pakui sillalpäi raududorogale.
Suuren ozattomuon dielonkačondu algoi täl nedälil Pohjas-Savon paikallizes suvvos.
Narkoutiekkoi käytettävien muamoloin kundovumine on vähennyh jyrkäh Enzi- da turvakodiloin liiton tarittavis kundovundukohtis. Liiton mugah nenga rodih enne kaikkie kundien pahennuon talovustilandehen täh.
ETKL:n Pidä kiinni -enzikodiloin ymbäri suutkis ruadajis kundovundukohtis sygyzyl ollah oldu käytös vaigu al puolet. Kundohpiäzijöin miäry ei äijäl eruo aijembien vuozien miäräs, ga kundovunduaijat ollah oldu lyhyömbät, migu tavan mugah.
Ymbäristöministerstvu otahes varustamah ezityksii uuzis kanzallizis puustolois Päivännouzu-Lappih Sallatundurin alovehele da Hämieh Evon meččyalovehele.
Evon kanzallizes puustos rodies todevujes muailman enzimäine tiedokanzallispuusto.
Ministerstvah niškoi luajittih kanzallispuustoaloittehet sežo Korouoman rotkonotkos, Porkkalan suaristos sego Puhkaharjun kanzallismaizeman da Haarikon meččien yhtistetys alovehes, ga net jiädih ministerstvan kaččelendas stolale.
Suomes on 40 (nellikymmen) kanzallistu puustuo. Niilöi ruvettih suvaimah vie enämbäl korona-aigua.
Kolin kanzallizes puustos varustetahes matkuniekoin miärän liženemizeh.
Kolin matkailualovehele on luajittu uuzi ylehine pluanu uvves azetusalovehes da toizis liikendehty koskijois dielolois. Ezimerkikse Kolin portu muutetah mašinoin azetuskohtakse.
Meččyhalličus da matkailuruadajat ollah sidä mieldy, gu käyjien miärät ližetäh moneh kerdah.
Kolin suvaičendu matkukohtannu on äijäl kazvanuh ulgomuanmatkailun loppevundan jälles.
Rastavanrauhan julgisanondu tänä vuon roih Turrus ilmai rahvastu koronaepidemien täh.
Turrun linnan mugah rastavanrauhu tiettäväine sanotah julgi, ga Brinkkalan taloin ymbäristö aijatah eigo ni Vahnale Suurtorile laskieta kaččojii. Ei rodei paikal ni iänentoistuo.
Yle välittäy rastavanrauhan julgisanondan tv:s, radivos da verkos.
Siirry sarjan sivulle arrow_forward_ios JAA:
