THL:n mugah Suomes on annettu algunedälissäh enäm 50 000 (viittykymmendy tuhattu) koronarokotehtu.
THL:n mugah Suomes on annettu algunedälissäh enäm 50 000 (viittykymmendy tuhattu) koronarokotehtu.
Kai Suomes annetut koronarokottehet ollah oldu Pfizeran da Biontechan kehitetyt. Yhtysvaldalazen Moderna-liečeyhtivön rokotehtu tulou Suomeh täl nedälil.
THL:n johtai specialistu Mia Kontio sanoi A-stuudies, gu rokottamine rubieu menemäh raviembah, konzu rokotehtu Suomeh suajah enämbi.
Suomes käytös olijah koronarokotteheh näh tässäh on työtty kaikkiedah kaheksa vahingovaikutusilmoitustu.
Liečealan turvalližus- da kehitändykeskus Fimea arvivoi, gu täs rokotusprogramman alguvaihies neče ilmoituksien miäry oli vuotettugi.
Kolmes tapahtukses on sanottu suurembah vahingoh näh.
Fimean mugah niilöis tapahtuksis pagin on allergienjyttyzes libo anafilaktizes reakcies, kudai on vaigei allergizen reakcien muodo.
Sociali- da tervehysministerstvu ravendau koronatestiiruičendua tärgiembil rajanylityskohtil.
Valmehusjohtajan Pekka Tulokkahan mugah koronatestiiruičendu pidäy algua jälgimäi nygöi vähimyölleh kaikil tärgiembil rajanylityskohtil.
Tavoittehennu on tavata herkäh leviejy uuzi muuttunuh koronaviirussu jo rajal.
Suvipuolizes Suomes suuri lumenpano on romahtutannuh sportuzualoin levoloi da tuonnuh ozattomuksii dorogal tossargen da kolmanpiän.
Erähien mugasanottuloin puzurizualoin levot ollah romahtettuhes vähimyölleh Tapiolan sportupuustos Espoos, Helsingis Myllypuros da Pakilas.
Kelan korvattavat voimattomuslomat kiännyttih alahpäi mulloi.
Enne kaikkie voimattomuspäivydengua oli maksettu mielentervehyön häirivölöin täh.
Maksettuloin päivien miäräl lugiettuloinnu mielentervehyön häirivöt ollah oldu suurin voimattomusjoukko jo vuvves 2018 (kaksituhattu kaheksatostu), ga niilöin kazvandu azetui nygöi.
Suajien miäry pieneni läs kaikis toizis piäjoukkolois.
Joukko aijembis perussuomelazis libo niilöin endizes nuorižojärjestös vaikutannuttu poliitikkua on perustamas uuttu puolovehtu, nenga sanou Uutissuomalainen.
Tiedo projektah näh on lujendettu sežo Ylele.
Sinimusta liike -nimel olii puolovehprojektu on registriiruinnuhes yhtistyksekse talvikuun lopul. Se sanou iččie kanzallismielizekse yhtistyksekse, kudai tahtou kerätä puolovehen perustamizeh niškoi tarvittavan miärän kannattajankartii.
Yhtistysregistran mugah Sinimustan liikkehen paginanvedäjänny on Tuukka Kuru, varapaginanvedäjänny Olavi Saarelainen da sekretarinnu Terhi Kiemunki.
Bas-gitaristu Marko Hietala lähtöy iäres Nightwish-yhtyvehespäi.
Hietala da Nightwish sanottih sih näh omil sivuloil somes.
Hietalan mugah häi on pettynyh äijih muuzikkutevolližuoh liittyjih dieloloih. Yhtyveh sanou, gu se kunnivoiččou Hietalan piätösty.
Nightwishan muailmangastrolit perävyttih mulloi keviäl koronapandemien täh.
Yhtyvehen tuliet gastrolit todevutetah basistan sijahizenke.
Nightwish on Suomen kanzoinvälizesti kuulužembii bändilöi. Hietala on olluh bändis vuvves 2002 (kaksituhattu kaksi) algajen.
Siirry sarjan sivulle arrow_forward_ios JAA:
