Pfizeran da Biontechan kehitetyn koronarokottehen työnnändymiärät ei muututtu järilleh samazikse uskalmoloih kaččomattah.
Lännen Median mugah mainittuu rokotehtu Suomeh suajah vuotettuu vähem tulien kuun keskivälissäh. THL:n eričysazientundijan Mia Kontion mugah Suomi suau täl aigua joga nedälii 45 000 (nellikymmen viizi tuhattu) rokotehtu, konzu miäry pidi olla 5 000 (viittytuhattu) suurembi. Häi arvivoi, gu rokottamine hillenöy vältämättäh.
Suomen kahten nedälin koronatartundat ollah selgiehgi nouzemas.
Kahten nedälin aigua on tovendettu 4109 (nellituhattu sada yheksä) koronatartundua, mi on läs 520 (viittysadua kahtukymmendy) tartundua enäm, migu iellizen kahten nedälin aigua. Koronatartundoin ilmitulendumiäry sežo jatkau nouzendua. Nygöi ilmitulendumiäry on läs 72 (seičendykymmendy kahtu) tartundua saduatuhattu eläjiä kohti.
THL:n mugah koronarokottehen Suomes on suannuh nygöi enäm 110 000 (saduakymmendy tuhattu) hengie. Piäl 70 (seiččiekymmen)-vuodizis enäm 31 000 (kolmiekymmendy yhty tuhattu) on suannuh vähimyölleh yhten rokotehannoksen.
Kolmanpiän Suomi otti käyttöh endisty lujembat muahtulendurajoitukset.
Suomeh suat tulla vaigu vältämättömän ruadomatkan täh Šengen-mualoispäi.
Rajapiätöksil pyrritähes piettelemäh koronaepidemiedy da aijembua tartuttavemban muuttunuon koronaviirusan leviendiä. Tavoittehennu on, gu kaikile rajan yli tulijole voidas luadie koronatestat ja työndiä tarvites karantiinah. Yhtelläh Suomen kanzalazil da Suomes eläjil on perustuszakonalline oigevus tulla muah da lähtie iäres muaspäi. Valvondua jatketah Suomen rajoil kuun aijan.
Sualoihsivotun päivydengan suajien miäry mulloi oli suurin 20 (kahtehkymmeneh) vuodeh, nenga sanou Ruavottomuskassoin yhtehine järjestö.
Mulloi sualoihsivottuu dengua sai läs puoldu miljonua hengie ruavottomuon libo lomaletyöndämizen aigua. Miäry kazvoi piäl 85 (kaheksalkymmenel viijel) prosental ennemullozes. Ruavottomuskasat maksettih mennyt vuon 2,7 (kaksi pilku seiččie) miljardua euruo sualoihsivottuu päivydengua, mi on nenga 60 (kuuttukymmendy) prosentua enäm ennemullostu.
OP-joukko ennustau Suomen talovuon kazvandua tänä vuon 3 (kolmel) prosental.
Tuliele vuvvele OP ennustau 2,6 (kahten pilku kuvven) prosentan talovuskazvuo.
OP:n ekonomistoin mugah kezäl alganuh elbymine on hillennyh koronapandemien ravenemizen täh. Vuotetah, gu rokotukset hil’l’akkazin kirkendettäs talovuon elbymisty kui Suomes, mugai muijal muailmas.
Yliopistot pyrritähes pidämäh keviän da kezän valličendukoittehet kampuksil libo toizis fiiziellizis tilois, nenga sanou Suomen yliopistoloin rehtorunevvosto UNIFI.
Yliopistot yhtelläh varustetahes organizuimah piäzendykoittehii sežo toizeh luaduh, pahennou koronatilandeh ielleh. Pyrgijät tiijustetah koittehien piendytaboih näh kevätkuun keskivälissäh.
Läs jogahine 15 (viizitostu) vuottu täyttänyh suomelaine lugou sanomulehtilöi.
Kanzallizen Mediitutkimuksen mugah digisyväindöt tavoitetah läs 90 (yheksiäkymmendy) prosentua suomelazis. Painettuu lehtie lugietah piäl puolet. Piäl 65 (kuuzikymmen viizi)-vuodizis painettuloi lehtilöi lugou nelli viijes. Sanomulehtilöin lugemine jagavuu tazah eri igäjoukkoloih, ammattijoukkoloih da tulokluassoih.
Siirry sarjan sivulle arrow_forward_ios JAA:
