Valličuskonehil on lähenemäs kunnanvalličuksis aijembua suurembi painoarvo.
Koronaepidemien täh perindölline kampuanienpiendy on jygei dielo, da sendäh tutkijoin mugah valličuskonehil roih enäm käyttyö. Ylen valličuskoneh avavui täl nedälil. Koneheh on vastannuh läs 15 000 (viittytostutuhattu) ehoitettuu, mi on nenga puolet kaikis ehoitettulois.
Monien helsingiläzien mugah tuliekse burgomistrakse paras olis kokoomuksen Juhana Vartiainen. Ylen kyzelys Vartiaistu kannattau 19 (yheksätostu) prosentua vastannuzis. Kiža burgomistran virras yhtelläh ozutahes raviekse. Vihandoin Anni Sinnemäen kannatus on vaigu vähästy vähem 18,7 (kaheksuatostu pilku seičendy) prosentua da SDP:n Nasima Razmyaran 14,5 (nellitostu pilku viizi) prosentua. Kyzelyn hairavomarginualu on 2,5 (kaksi pilku viizi) prosentuyksikkyö.
Koronarokottehien täh roinnuzis vahingolois on maksettu Suomes korvavustu 15 (viijeletostu) hengele. Maksetut summat vaihtellahes 600 (kuvvensuan) da 2 000 (kahtentuhanden) euron välil, nenga sanou Suomen keskinäine liečevahingokaičusyhtivö. Korvavustu on maksettu ezimerkikse hibjutavvis, allergies da imusolmukkehien turbuomizes. Korvavukset maksau Suomen valdivo.
Suomelazen koronarokottehen finansiiruičendah tuulou vastaine tuuli. Nenä-spraynny annettavua rokotehtu kehitännyh Rokote Laboratories Finland on pakinnuh Business Finlandalpäi kymmenii miljonoi euroloi rokottehen testiiruičendah. Yhtelläh dieloh vuotetah sen-tämän miljonan euron laihinua. Business Finlandan mugah rokotehprojektu ei voi suaja eričyksellisty kohtavundua, hos valdivo ongi uskaldannuh sille rahoitustu.
Valdivon kilbavutettu lendoliikendeh kodimuan aerodromoile algavuu. Finnair loppi liikendöičendän kevätkuul da sijah tuldih ruoččilaine, latvielaine da estounielaine lendoyhtivö. Ezmässargen avavuttih maršrutat Helsingispäi Jovensuuh, Kemih da Kokkolah. Myöhembä alletah Jyväskylän da Kajuanin lennot. Ostoliikendeh turvuau lennot loppuvuvvekse.
Tamberen tramvain testiiruiččemine eistyy edehpäi. Täl nedälil kyydih ollah piästy enzimäzet eksperimentumatkuniekat. Koronaepidemien täh kyydih piästäväkse pidäy ilmoittuakseh ennepäi. Matkuniekoin miäry on rajattu, gu turvuvälit voidas garantiiruija. Tamberen tramvain varzinaine ajandu algau elokuun algupuoliškol.
Ylen varavonalazen kil’l’uihanhen pezindykohtii tutkitah vezistöspäi otettavien DNA-näyttehien vuoh. Tarkoituksennu on sellittiä, peziygo laji Suomes. Pohjazen kil’l’uihanhiloin kandu on kazvamas, da sendäh lajin pezindy enne kaikkie pohjazembas Lapis on aijembua tovennägözembi. Jälgimäzikse laji on pezinyh Suomes 1990 (tuhat yheksäsadua yheksäkymmen)-luvul. Pohjazis mualois nygöi tiettyy pezindykohtua on Norvegies.
Kuhmos on pellastettu tämänvuodine kondienpoigu. Taloin pihah algunedälil čoivahtih pieni kondiene, kudaman emiä ei nägynyh. Kondienpoigu pyzyi pihas eigo emä ni ozutannuhes. Sendäh piätettih, gu kondienpoigu on jiännyh orboikse. Se ozuttihes väzynyökse da söi paiči muudu pihas harjattuloin koirien karvua. Kuhmolazet suurriistuvirguavun ozanottajat jälgimäi suadih kondiezen lähembä. Kondiene on viedy kondieloin orboikodih, Kuuzamon suurpedokeskukseh. Kondiezele on pandu nimi Aina.
Siirry sarjan sivulle arrow_forward_ios JAA:
