Ven’a on hyökännyh Ukrainah.
Täyzimiärähine hyökkävys algoi nellänpiän monis čurispäi. Tulitustu da räjähtysty on kuultu ezimerkikse piälinnas Kievas, muan päivännouzučural Har’kovas, Kramatorskas, Mariupol’as, Odessas da Ščast’as. Kievas objektannu ollah oldu vojennoit kohtat.
Koronah liittyjien erimieližyksien täh rodih riidua äijis perehis da sugulois. Tavallizih riijoin tiemoih kuulutah kohtavundu kerävyndyrajoituksih libo koronarokotuksih. Puaruvälikeskukses Katajas sanotah, gu risturiijat ollah ližätty moneh kerdah sežo avun tarbehengi. Puaruvälikeskus Kataja čat- da telefonnevvondan klijentoin miärät ollah ližetty nelläh kerdah. Verkoluvendoloin ozanottajien miärät ollah suurettu kai kuudeh kerdah verraten aigah enne koronua.
Suomelazet sportuiččijat ollah tuldu järilleh kodih olimpiiskolois kižoispäi. Suomen joukkoveh sai Pekingas parahan tuloksen 20 (kahtehkymmeneh) vuodeh. Kaksi kuldua, kaksi hobjua da nelli bronzua nostettih Suomen 16. (kuvvendeletostu) sijale Pekingan olimpiiskoloin kižoin medalitaulukos. Sportuiččijoin kodih tulendan kunnivokse täl nedälil on pietty äijy rahvahanpruazniekkua. Ezimerkikse tossargen pruaznuittih Kerttu da Iivo Niskazen olimpiiskoloi medaliloi Vieremäl. Kuldazen medalin voittanuole miehien jiäkur’oin muajoukkovehele piettih pruazniekku Helsingin olimpiskoil stadional. Ezmässargen pietys pruazniekas keräl oli nenga 20 000 (kaksikymmen tuhattu) hengie.
Yle välitti Pekingan olimpiiskoloi kižoi miljonoile kaččojile da kuundelijoile. Kižatapahtumih da uudizih näh saneltih suomekse da ruočikse televiizoras, radivos, Yle Areenal da Ylen saital. Ylen tv-lähetykset tavoitettih 3,9 (kolme pilku yheksä) miljonua hengie. Miehien muastohiihton viesti keräi suuremban keskiluvun, nenga 1,6 (yksi pilku kuuzi) miljonua kaččojua. Ylen verkopalvelulois olimpiiskoloih kižoih liittyjii videoloi kačottih 38 (kolmekymmen kaheksa) miljonua kerdua.
Hiihtoloma on alganuh Suvi-Suomen školis. Äijät perehet ollah matkattu Lappih suksittamah da hiihtämäh mäis. Algutalvi oli Lapis vähälumehine, ga nygöi monis kohtis lundu on tavanmugastu enämbi. Ezimerkikse Levil Kittiläs, Inarin Suariselläl da Käzivarres lundu nygöi on jo metri. Suariselläl lomanedäli on alganuh suurel tulipalol. Laukkukeskus Kuukkeli Suarisellän keskučas paloi läs kogonah. Huonuksis oli ezimerkikse matkuandukeskuksen ainavo syömislaukku.
Toinargi oli ravei svuad’bupäivy. Äijät tahtottih mennä kirjah da venčale juuri tossargen päivän noumeran täh. Svuad’bupäivy noumeroin kirjutetunnu oli 22022022 (kaksi kaksi nol’a kaksi kaksi nol’a kaksi kaksi). Kuvven kakkozen svuad’bupäiviä on jygei unohtua. Ezimerkikse digi- da rahvahalistotiedovirrasto pani kirjah yhtes päiväs läs 400 (nelliäsadua) puarua.
Siirry sarjan sivulle arrow_forward_ios JAA: