Suomele pidäy varustuakseh Ven’an informacii- da kibervaikuttamizeh.
Suomen da Ruočin turvalližuspalveluloin mugah Ven’alpäi vähimyölleh tässäh ei ole nägynyh poikkevuksellistu vaikutandua. Mollembat muat ollah varustettuhes sih, gu Ven’a pyrgiy vie vaikuttamah Suomes da Ruočis menijäh Nato-processah. Nenga arvivoittih Ruočin Säpon johtai Charlotte von Essen da Supon johtai Antti Pelttari yhtehizes tiijoituspivos Helsingis kolmanpiän. Pelttarin mugah Suomelegi yhtelläh pidäy varustuakseh ezimerkikse informacii- da kibervaikuttamizeh.
Piättäjät tahtottih vähätellä koronapandemiedu da pantata tieduo kanzalazil, nenga sanou uuzi tutkimus. Enzimästy koronavuottu kaččelijan Tervehyön da hyvinvoindan laitoksen i Tamberen yliopiston luajitun piättäjien pagizuttelututkimuksen mugah suurembii probliemoi oldih piätösvaldah liittyi ebäselgevys sego luottamuksen vajavus kanzallizen da alovehellizen tazon piättäjien välil. Tutkimusraportas tovendetah, gu ”suomelazen tervehyssistieman malto ennakoija kaikkie yhteskundua koskijua pitkennytty kriizissua, kudai vuadinus yhtehisty ruaduo eri sektoroin da sistieman eri tazoloin välil, oli heikko”. Pandemien halličendas da piätöksenluajindas nägövih nouzi enne kaikkie kolme probliemua: ezmäi pandemieh ei tahtottu uskuo, tieduo oli vähä da sidä pantattih. Luottamuksen vajavus vaigevutti kanzallizen da paikallizen tazon yhtehisty ruaduo.
Kuluttajien da yrityksien vuottamizet talovuon kehitykses ollah syngetty sulakuul. Tämä tiijustettih Statistiekkukeskuksen da EK:n tiedolois. Kuluttajien vuottamizet infl’acies oldih korgiembal, migu konzutahto enne miäriändyhistouries. Statistiekkukeskuksen mugah kuluttajien luottamus on olluh nečidä heikombal tazol vaigu koronakriizisan allus sulakuul 2020 (kaksituhattu kaksikymmen) da vuvvennu 2008 (kaksituhattu kaheksa), konzu oli finansukriizissu.
Uvven pasportan luajindu voibi kestiä hätken.
Korona-aigua suomelazile ei puaksuh pidänyh pasportua, sendäh gu ulgomualoile ei käydy. Nygöi matkuandu myös liženöy, da äijät huomatah, gu pasportu on mennyh vahnakse. Ezimerkikse Helsingin policiilaitoksele joga päiviä kävyy kai 800 (kaheksasadua) hengie, kuduat tarvitah uuttu pasportua. Internetan kauti on jygei tilata sih aigua. Helsingis dieluo opitah kebjendiä. Rahvas voijah tilata aigua sežo nedälinlopule.
Da lopukse toivotammo vie Hyviä Vappuu kaikile!
Siirry sarjan sivulle arrow_forward_ios JAA: