Nuoret ollah viritty karjalažuoh.
Erähät tahtotah pellastua karjalan kielen, ga toizile roih jo tiijos omih sugujuurih näh. Nuoret täytetäh karjalan kielen kursoi, ga perindöllizet karjalazet yhtistykset kučutah kuundelemah vahnemban polven starinoi. Jyväskylän yliopistos väitöskirjututkijannu ruadajan Pirja Hyyryläizen mugah nuoret ollah buitegu paikkuamas loukkuo, kudai on voinnuh roita omas suvus, konzu kieli da perindehet oldih jiädy evakkomatkan varrel.
Kanzoinvälisty saamen kielien nedälii pietäh nygöi jo nellätty kerdua. Ezmässargen algavunnuon kielinedälin tavoittehennu on tuvva kielet nägövih, da piduo organizuijah kui Suomes, mugai Norvegies dai Ruočisgi. Joga vuottu Saamenmuan eri čuril piettävät saamen kielien nedälin avuajazet ollah merki yhtehizeh pruaznuičendah da saamen kielien nägövih nostandah kogo Saamenmual. Enämbi kielinedälin tapahtumua pietäh Norvegies, ga sežo Ruočis da Suomes on omua piduo. Ezimerkikse kielikoufeičuppuzii pietäh kui Ivalos, mugai Jyväskyläs da Nokial.
Suomi on sijoitannuhes nelländekse EU-mualoi koskijas sugupuolien taza-arvoverdailus, nenga tiijoittau sociali- da tervehysministerstvu. Euroupan taza-arvoinstituutan verdailus miärättih taza-arvon todevutandua ezimerkikse ruadomarkinoil tervehyönhuollos da vallankäytös. Suomen čökkehet verdailus oldih piäl EU:n keskiarvon. Suomen iel sugupuolien taza-arvos nostih Ruočči, Danii da Hollandii. Verdailun tiijot oldih enimite vuvvel 2020 (kaksituhattu kaksikymmen).
VR investiiruiččou 250 (kaksisadua viizikymmen) miljonua euruo lähiliikendeheh da tahtou ostua šveicilazel yhtivöl kaikkiedah 20 (kaksikymmen) sähköjunua. Myöhembä VR:l on mahto ostua yhtivöl vie 50 (viizikymmen) pojiezdua ližiä. Ezmässargen VR saneli sežo hyväs tuloskehitykses heiny-syvyskuul. Kannattavus on parannuh, konzu loittoliikendehen matkumiärät ollah tuldu järilleh koronan iellizel tazol. Lähijunaliikendeh on toibunuh hillembäh.
Šiippurattahien vuitti talvirengahien ajettulois ozattomuksis on kazvanuh jyrkäh. Friksionnoloin rattahien vuitti samah aigah on pienennyh, nenga sanou Rattahat dorogan mugah -kampuanii. Friksionnoloin vuitti talviozattomuksis on olluh vai kuuzi prosentua, hos niilöin oza liikendehes on nossuh läs kahtehkymmeneh prosentah sah. Talviliikendehes ratastiippua tärgiembi turvalližuttu ližiäjy dielo on ennakoiččii da varovaine ajanduluadu.
Poštu loppou Ukrainan voinan täh poštupalvelut Teboil-azemil. Jo aijemba kevätkuul Poštu ilmoitti, gu se loppou juandu- da kulletusajonevvoloin tankavuksen Teboil-azemil, sendäh gu Teboil on ven’alazen Lukoilan tytäryhtivö. Poštal Suomes on palvelučökehty nenga 3 300 (kolmetuhattu kolmesadua). Poštu lugou miäräh sežo posilkuautomuatat, kudamii on 2 300 (kaksituhattu kolmesadua).
Koronaviirusan miäry jätehvezis on nouzemas lujah, sanou Tervehyön da hyvinvoindan laitos. Koronaviirusan jätehvezikačondas keräl on yheksä paikkukundua. Koronaviirussua on kaikil paikkukunnil ylen äijy. Menemäs vikse on koronaviirusan epidemien huippu, nenga sanou THL.
Siirry sarjan sivulle arrow_forward_ios JAA:
