Verohallindo on jullannuh vuvven 2021 verotiijot.
Suomen suuritulozembien teräle nostih kižayrittäjät kymmenien miljonoin euroloin tuloloinke. Verostatistiekan ykköine on kižayhtivö Supercellan perustajih kuului Ilkka Paananen läs 59 (viijenkymmenen yheksän) miljonan euron tuloloinke. Enimite sualoituluo mulloi sai ohjelmistoyhtivö Qt Groupan toimitusjohtai Juha Varelius. Hänen sualoitulot oldih enäm 27 (kahtukymmendy seičendy) miljonua euruo. Tuhandes suuritulozembis enimät oldih miehii da piäl puolil heis igiä on 40–59 (nellikymmen – viizikymmen yheksä) vuottu.
Sähköyhtivö Lumo Energia on pakinnuhes bankrotakse. Bankrottupakičus jätettih ezmässargen Helsingin paikallizeh suudoh. Yle saneli Lumo Energian bankrotakse menendäh näh ligakuun lopul, konzu nevvottelut aziekaskorvavuksis Kilbu- da kuluttajanvirraston kel loppiettihes tuloksettah. Lumo Energia loppi sähkötoimitukset syvyskun allus da irdavutti omassah nenga 8 000 (kaheksantuhanden) aziekkahan miäryaigahizet sähkösobimukset enne niilöin loppevunduaigua.
Energiivirrasto sellittäy kohtalastu sähkön hindua. Syynny ollah äijät hinnoittelendua koskijat tutkindupakičukset. Sähkömarkinuzakonan mugah toimitusvelvollizel vähittäsmyöjäl pidäy toimittua sähkyö kohtalazeh hindah kuluttajile dai toizile pienile käyttäjile. Energiivirrastol ei ole aijembua piätösty libo liinienozutandua sähkömarkinuzakonan tarkoitettuh kohtalazeh hindah näh.
Energiikriizissu on iškemäs suomelazeh kazvintuotandoh. Ezimerkikse tomuatan kazvatandu on vähenemäs al puolessah tavanmugazes. Yhtel aigua suomelazen tomuatan hindu nouzou. Arvivoloin mugah kogo Euroupan tomuatantuotando pienenöy tänä vuon läs kymmenel prosental.
Kuluttajien ližennyh siäständy nygöi nägyy syömislaukan myöndymiäris. Eloitarvikkehien myöndän miäry pieneni heiny-syvyskuul, nenga sanou Päivittästavarulaukku-yhtistys. Enne kaikkie on pienennyh moizien kallistunnuzien eloitarvikkehien, kui kalan myöndy. Yhtel aigua eloitarvikkehien da alkohol’attomien juomizien myöndän arvo kazvoi piäl 7 (seiččemel) prosental mullozes.
Opastus- da kul’tuuruministerstvu panou käymäh sellityksen elättiliägärilöin suadavuon parandamizeh niškoi. Elättiliägärilöi ei tävvy kaikes Suomes. Sellitykses arvivoijah, opastetahgo elättiliägärii Suomes muga äijän, min pidäs. Ližäkse projektas sellitetäh toizii syylöi elättiliägärilöin ruadohottamizen probliemoih da luajitah ehoitustu kui ruadoeloksen, mugai opastuksengi kehitändäkse. Sellityksen painočökkehenny on tuotando- da valvonduelättiliägärilöin suadavuon parandamine.
Suomelazil korgeiškolil vie on äijy ruattavua opastus- da tutkimusruadajien taza-arvon edehpäi eistämizekse, nenga sanou uuzi sellitys. Opastus da kul’tuuruministerstvan tilatun sellityksen mugah etnizet vähembistöt tundietah korgeiškolis syrjindiä läs kahtu kerdua puaksumbah, migu valdurahvahalisto. Yhtenjyttyöh tuldih nägövih naizien urakehityksen probliemat. Loppuraportu nevvou, gu korgeiškolat azuttas selgiembikse ruadohottamizen kritieriet da viestittäs valličenduperustehis nygösty avvonazembah luaduh.
Seurukunnanvalličuksien ennepäi-iänestys algavui tossargen da se jatkuu suovattassah. Varzinaine valličuspäivy on pyhänpiän 20. (kahteskymmenes) kylmykuudu. Seurukunnanvalličuksis vallitah piättäjät jevangelis-l’uteranskoin kirikön kirikkövaldujoukkoloih. Ennepäi voibi iänestiä ezimerkikse laukois, opastundulaitoksil, kirjastolois da kirikköherranvirrastolois. Varzinazennu valličuspäivänny iänioigevutettu voibi iänestiä omassah seurukunnan iänestyskohtas. Iänioigevutetut ollah kaikin 16 (kuuzitostu) vuottu täyttänyöt jevangelis-l’uteranskoin kirikön ozanottajat.
Siirry sarjan sivulle arrow_forward_ios JAA:
