Máŋggat sápmelaččat leat váldán almmolaččat beali sámediggeláhkii ja searvan ságastallamii lága birra. Go unnitlohkui gullevaš buktá iežas oainnu ovdan, gártá son dávdjá lohkat juobe veahkaválddálaš uhkádusaid. Arvedávgesápmelaš, sámeaktiiva Janne Hirvasvuopio lohká duođalaš geahčastagain kommeanttaid, mat leat sáddejuvvon sutnje vássán vahku siste. Suoma Sámi Nuorat -searvvi ságadoalli Petra Laiti bealistis lea gidden fuomášumi seamma áššái, go identitehta árvvoštallet ja eahpidit, sáhttágo olmmoš duođaid leat sápmelaš.
Ohcejoga gielddahoavda Taina Pieski lea oččon máhcaga ahte su barggus ii oažžole oaivvildit almmolaččat sámediggelágas. Pieski lea hirbmástuvvan ja suorganan ságastallamis sámediggelága oktavuođas - go lea sáhka EU áidna álgoálbmoga gielalaš ja kultuvrralaš vuoigatvuođain, dan barggus maid sámediggi dahka ja gii sáhttá sámedikkis leat evttohassan ja gii sahttá jienastit, nu disinformašuvnna mearri lea áibbas issoras. Pieski mielde juohkehaš ferte váldit ovddasvástádusa iežes dadjámusain ja oaidná ahte Suopmelaš ovttasgoddi dássi ii leat allát go veardida riikabeaiáirasiid dajámusaid.
Neahttavašši, man sápmelaččatge leat eandaliige vássán áiggiin gártán vásihit, orru maiddái bolesa mielas lassánan. Neahttaboles Daniel Kalejaiye dahjege "Konstaapeli Daniel" lea dovddus earenoamážit nuoraid gaskkas sosiála medias, go sus leat konttut, main son muitala ovdamearkka dihte rihkosiid birra.
Kalejaiye muitala, ahte neahttavašši lea su mielas lassánan ja rasisma lea neahtas earálágan, go dan oidnet maiddái sii, geaid čalmmiid ovdii rasisma ii dábálaččat leat boahtán.
Sámenuorat orrot diehtimin vaššiságaid vaikkuhusaid eaige hálit kommenteret álmmolaččat iežaset oaiviliid. Sámenuorat orrot goit leat dál gergosat muitalit oainnuideset jos besset muitalit ságaid čiegus identitehta bokte.
Doaimmaheaddjin Linda Tammela. Ságaid čohkkii Aslak Paltto.
Siirry sarjan sivulle arrow_forward_iosJAA:
